Sjálfstraust leikmanna Man. Utd hefur minnkað

Leikmenn Man. Utd eru í óvenjulegri stöðu þar sem illa hefur gengið í upphafi tímabils. Í stað þess að berjast á toppnum er liðið í níunda sæti deildarinnar.

Varnarmaðurinn Jonny Evans viðurkennir að þetta slæma gengi hafi áhrif á andlegt ástand leikmanna liðsins.

"Við höfum tapað sjálfstrausti. Það sést vel á leik liðsins. Við höldum bolta ekki eins vel og áður og hugmyndaflugið er minna. Leikmenn eru ekki að spila eins og þeir eiga að sér. Það gerist er leikmenn missa sjálfstraust," sagði Evans.

Liðið er búið að tapa tveim heimaleikjum í röð og fimm leikjum í heildina í vetur.

"Þegar við lendum undir á heimavelli erum við vanir að pressa stíft. Það gerðum við ekki gegn Newcastle. Þar kemur aftur inn skortur á sjálfstrausti."