Campbell handtekinn fyrir veðmálabrask

DJ Campbell, sóknarmaður Blackburn, er einn þeirra sex sem hafa verið handteknir í tengslum við rannsókn lögreglunnar í Bretlandi á meintri hagræðingu úrslita knattspyrnuleikja þar í landi.

Breska dagblaðið Sun on Sunday birti um helgina gögn sem sýna að Sam Sodje, fyrrum varnarmaður Portsmouth, hafi tekið við greiðslu upp á 70 þúsund pund fyrir að láta reka sig af velli í leik í ensku C-deildinni í fyrra.

Sodje var handtekinn sem og tveir bræður hans, Akpo og Steve. Sá fyrrnefndi leikur með Tranmere en Steve starfar sem viðskiptamaður.

Tveir aðrir voru handteknir. Þeir Cristian Montano, sem leikur sem miðvallarleikmaður hjá Oldham, og Ian Goodison, varnarmaður hjá Tranmere. Öllum hefur verið sleppt úr haldi gegn tryggingu nema Goodison.

Campbell fékk að líta gula spjaldið í leik gegn Ipswich í ensku B-deildinni í síðustu viku og leikur grunur á að það hafi verið viljandi gert í hagnaðarskyni.

Campbell er 32 ára og hóf feril sinn í utandeildinni. Hann komst svo á samning hjá C-deildarliði Brentford árið 2005 og var aðeins hálfu ári síðar keyptur til Birmingham sem lék þá í ensku úrvalsdeildinni.

Hann hefur síðan þá leikið með Leicester, Blackpool, Derby, QPR, Ipswich og nú síðast Blackburn.