Wenger: Sannfærandi sigur á góðu liði

Arsene Wenger, knattspyrnustjóri Arsenal, er á góðri leik með að búa til meistaralið en hans menn sýndu frábæran leik í 2-0 sigri á Liverpool í toppslag ensku úrvalsdeildarinnar í kvöld.

„Þetta var sannfærandi sigur á móti góðu liði og einmitt það sem okkur vantaði. Við vildum svara tapinu í vikunni," sagði Arsene Wenger við BBC en Arsenal datt út úr enska deildarbikarnum í vikunni.

„Fyrsta markið var þýðingarmikið og eftir það fannst mér við eiga möguleika á að klára leikinn. Aaron Ramsey skoraði stórglæsilegt mark," sagði Wenger. Santi Cazorla skoraði fyrra mark Arsenal á 19. mínútu leiksins.

„Það voru bara toppleikmenn í mínu liði í dag. Aaron er ungur leikmaður og hefur enn tíma til að bæta sig. Hann er kominn með miklu meira sjálfstraust fyrir framan markið," sagði Wenger um Aaron Ramsey sem skoraði sitt tíunda mark á tímabilinu.

„Það er mjög jákvætt að vera komnir með fimm stiga forskot en við erum ennþá snemma á tímabilinu," sagði Wenger. Arsenal er með fimm stigum meira en bæði Cheslea og Liverpool sem töpuðu bæði leikjum sínum í dag.