Arsenal sýndi mátt sinn í sigri á Liverpool - fimm stiga forskot

Arsenal er komið með fimm stiga forskot í ensku úrvalsdeildinni eftir sannfærandi 2-0 sigur á Liverpool á Emirates-leikvanginum  í kvöld í uppgjöri tveggja efstu liða deildarinnar. Liverpool-menn áttu litla möguleika á móti frábæru Arsenal-liði sem sýndi svo sannarlega mátt sinn í þessum leik.

Santi Cazorla og Aaron Ramsey skoruðu mörk Arsenal sem hefur nú 25 stig eða fimm stigum meira en Chelsea og Liverpool sem töpuðu bæði leikjum sínum í dag.

Arsenal hefur unnið átta af síðustu níu leikjum sínum í ensku úrvalsdeildinni og liðið sýndi með frammistöðu sinni í kvöld að Arsenal er líklegt til þess að enda langa bið eftir titli á þessu tímabili.

Santi Cazorla kom Arsenal í 1-0 á 19. mínútu þegar hann fylgdi á eftir eigin skalla í stöngina. Cazorla afgreiddi frákastið glæsilega í markið.

Aaron Ramsey bætti við öðru marki á 59. mínútu með laglegu langskoti eftir að hafa fengið boltann frá Mesut Özil. Þetta var tíunda mark Aaron Ramsey á leiktíðinni.

Liverpool-liðið lifnaði aðeins við undir lokin og mark frá Liverpool lá í loftinu á lokakafla leiksins en Arsenal-vörnin hélt út og hélt markinu sínu hreinu.

Arsenal ógnaði einnig í hvert sinn sem liðið komst inn á síðasta þriðjunginn með sínu stórskemmtilega stutta spili sem sprengir upp hvaða vörn sem er. Mörk Arsenal hefðu því getað orðið mun fleiri.



Staðan í ensku úrvalsdeildinni.