Óvíst um öryggi Íslendinga á Filippseyjum

Sambandslaust hefur verið í morgun við eynna Biliran, þar sem Íslendingar sem starfa hjá Jarðborunum, eru staðsettir -- átta talsins. Veður er þó ekki verst þar og gengið hafði verið tryggilega frá öllu þannig að Rúnar Þór Jónsson yfirverkefnisstjóri hjá Jarðborunum, sem staddur er í Manila, telur þeim óhætt.

Haiyan er fimmta stigs fellibylur, eða ofurfellibylur og sá öflugasti sem myndast hefur í ár. Vindstyrkurinn er samkvæmt bandarísku veðurfræðistofnunarinnar 87 metrar á sekúndu, þá er lægðamiðjan náði landi á eynni Samar sem er austast í eyjaklasanum. Þó Rúnar Þór hafi ekki náð sambandi við sína menn á Biliran, nú í morgun hefur hann ekki þungar áhyggjur af þeim.

„Stormurinn þar sem hann er mestur fyrr í dag er í 120 kílómetra fjarlægð frá því þar sem við erum með starfsemi. Var fjögurra stiga en er kominn niður í þriggja stiga. En, þar sem við erum, í Biliran, er lélegt símasamband. Við höfum ekkert náð tali af neinum á eyjunni í dag. Það er allt úti, símalínur, hvort sem er landlína eða GSM. Það skiptir í raun engu máli hver er að reyna að hringja. Við erum í sambandi við þingmanninn sem er fyrir Biliran og hann hefur ekki náð í gegn heldur. Við vitum bara að veðrið er ekki eins slæmt þarna sem starfsmenn Jarðborana eru að vinna og þar sem það hefur verið verst. Svo er starfsemin ofarlega, vel yfir sjávarmáli, þannig að ef flæðir þá ætti það ekki að bitna á okkar mönnum.“

Fram hefur komið í fréttum að í það minnsta fjórir hafa látist vegna stormsins. Að sögn Rúnars höfðu menn tveggja daga fyrirvara á að undirbúa sig og ganga frá öllu. Stafsmenn Jarðborana á Biliran eru átta talsins. Eyjan er lítil og staðsett í fyrir miðju eyjaklasans. En, þrír eru staðsettir á Manila. En, ástandið almennt á Filippseyjum?

„Það er náttúrlega ekki gott. Öllum opinberum stofnunum er lokað í Manila í dag af ótta við að stormurinn nái hingað. Forsetinn ávarpaði þjóðina í gær og varaði við þessu. Þær fréttir sem við fáum hins vegar frá Tacloban, þar sem við þurfum að fljúga í gegn, er að flugvöllurinn þar er gjörónýtur. Þar er miðja fellibylsins. Það er sem sagt, í 120 kílómetra fjarlægð frá okkur, en þó ekki nægjanlega mikilli til að hægt sé að teljast öruggt. Þessi stormur hefur náttúrlega haft áhrif á 25 milljónir manna, sem er um það bil fjórðungur þjóðarinnar, þannig að þetta er náttúrlega alveg gríðarlegt,“ segir Rúnar Þór Jónsson hjá Jarðborunum.