Mourinho: Dýfur eru smánarlegar

Jose Mourinho knattspyrnustjóri Chelsea segist ætla að refsa leikmönnum sínum sem gera sig seka um að kasta sér niður til þess eins að reyna að veiða brot á andstæðing sinn, m.ö.o. dýfa sér.

Það sauð á Portúgalanum um síðustu helgi þegar honum fannst Jan Vertonghen varnarmaður Tottenham sýna leikræna tilburði til að fiska Fernando Torres framherja Chelsea útaf með rautt spjald.

„Ég hata dýfur,“ sagði Mourinho. „Leikmenn mínir vita að þeir eru í miklum vandræðum ef þeir dýfa. Það er óþolandi.

„Að reyna að veiða annan leikmann útaf er smánarlegt. Ef ég mun einhvern daginn vinna leik vegna þess að einhver leikmanna minna hagaði sér ranglega mun ég gagnrýna hann harðlega.“

Neymar leikmaður Barcelona og Mario Balotelli hjá AC Milan voru sakaðir um dýfur í Meistaradeildinni í vikunni og segir Mourinho að knattspyrnuyfirvöld þurfi að beita sér af meiri hörku í að uppræta vandamálið.

„Jurgen Klopp stjóri Borussia Dortmund fékk tveggja leikja bann fyrir að ræða við dómara en Neymar? Balotelli?

„Þetta snýst um forgangsröðun og við skulum vona að þetta land fari í rétta átt. Þetta snýst ekki um að vinna eða tapa. Þetta snýst um að viðhalda menningu eða breyta henni.

„Ég hef ekki tekið leikmann út úr liðinu fyrir dýfingar en ég hef varið ákveðinn og gagnrýninn. Ég talaði um þetta við (Didier) Drogba og (Arjen) Robben,“ sagði Mourinho en lið hans Chelsea sækir Norwich heim í beinni útsendingu á Stöð 2 Sport 2 klukkan 12:30.