Moyes virðist hafa hunsað ráðleggingar frá Ferguson

David Moyes, knattspyrnustjóri Manchester United, virðist hafa hunsað ráðleggingar frá Sir Alex Ferguson, fyrrum stjóra liðsins, um að halda áfram sama þjálfarateymi í kringum liðið.

Moyes lét þá Mike Phelan, Rene Meulensteen og Eric Steele fara frá liðinu og réði sína eigin aðstoðarmenn.

Chris Woods, Steve Round og Jimmy Lumsden komu allir til United ásamt Moyes frá Everton sem og Phil Neville sem er í dag hluti af þjálfarateymi Englandsmeistarana.

Manchester United tapaði, 2-1, fyrir WBA á laugardaginn og versta byrjun félagsins í sögu ensku úrvalsdeildarinnar því orðin staðreynd. United er aðeins með sjö stig í 12. sæti deildarinnar.

„Hann talaði við mig, Mick og Rene og sagði að okkar þjónusta væri ekki lengur óskað,“ sagði Eric Steele í enskum fjölmiðlum.

„Þetta þótti mér nokkuð einkennileg ákvörðun og taldi hann vera mjög hugrakkan. Moyes hafði fengið ráðleggingar frá Alex Ferguson um að halda áfram sama teymi, en hann vildi sjálfur fá að taka þá ákvörðun.“

„Ég vildi persónulega ekki hætta hjá klúbbnum, af hverju ætti ég að vilja það?“

„Það var allt til staðar, sami mannskapur og sama viðhorf sem hefur gert þetta félag að því sem það er í dag, sigurvegarar.“

„Ferguson mældi með því að Moyes myndi halda því sem fyrir var og fá þjálfarateymið til að leiðbeina honum í upphafi tímabilsins. Við vorum vel smurða vél og allt hafði gengið einstaklega vel á árunum áður.“

„Maður verður auðvitað að skilja hans sjónarmið og ég skil í raun hans ákvörðun. Það er auðvelt að benda á þetta núna, eftir þessa byrjun hjá liðinu.“

„Þetta er gríðarleg breyting á einu liði. Knattspyrnustjórinn, yfirmaður knattspyrnumála, Scholes og allt þjálfarateymið eru allir farnir frá félaginu.“