Suarez sneri aftur með látum í sigri Liverpool

Það var ekki að sjá að Luis Suarez væri eitthvað ryðgaður eftir að hafa tekið út 10 leikja bann í 3-1 sigri Liverpool á Sunderland á Stadium of Light. Suarez skoraði tvö í leiknum eftir góðar sendingar frá Daniel Sturridge.

Daniel Sturridge skoraði fyrsta mark leiksins sem var vafasamt, boltinn virtist fara af hendi Sturridge og í netið. Örfáum mínútum seinna átti hann fína rispu upp hægri kantinn og lagði boltann á Suarez fyrir framan autt netið.

Sunderland náði að klóra í bakkann í seinni hálfleik en Luis Suarez afgreiddi leikinn fyrir Liverpool þegar skammt var eftir og gerði út um vonir Sunderland að ná stigi.

Með sigrinum fer Liverpool upp fyrir Tottenham á markatölu í annað sæti, tveimur stigum á eftir toppliði Arsenal.