Graham Poll: Young á að fara í fimm leikja bann

Englendingurinn Graham Poll, fyrrum knattspyrnudómari, vill meina að Ashley Young, leikmaður Manchester United, ætti að fá fimm leikja bann fyrir leikaraskap í leik Crystal Palace og Manchester United um helgina.

Young fékk gult spjald fyrir dýfu í umræddum leik og var dómarinn alveg viss í sinni sök. David Moyes, knattspyrnustjóri Manchester United, gagnrýndi leikmanninn á blaðamannafundi eftir leikinn og sagði að hann muni ekki líða svona hegðun.

„Ashley Young er svindlari og ætti að fá fimm leikja bann fyrir svona hegðun,“ segir Graham Poll í pistli sínum í Daily Mail.

„Menn verða fá harða refsingu ef það á að uppræta svona leikaraskap. Honum tókst ekki að blekkja dómarann að þessu sinni en hann hefur margoft verið uppvís af slíku. Svona leikaraskapur hefur gríðarleg áhrif á störf dómaranna og truflar þá.“