Tvö 400 leikja tímamót hjá Liverpool í kvöld?

Augu margra verða á Liverpool í kvöld þegar eina lið ensku úrvalsdeildarinnar með fullt hús heimsækir Swansea í mánudagsleiknum en þetta er lokaleikur fjórðu umferðarinnar. Steven Gerrard og Liverpool geta náð ólíkum 400 leikja tímamótum og bæði Daniel Sturridge og Simon Mignolet munu reyna að fylgja eftir frábærri byrjun sinni á tímabilinu.

Steven Gerrard mun í kvöld bera fyrirliðaband Liverpool í 400. sinn í öllum keppnum en hann fékk fyrirliðabandið fyrst í nóvember 2002 í deildarbikarleik á móti Southampton.

Liverpool getur fagnað tímamótum leiðtogans í kvöld með því að vinna sinn 400. sigur í ensku úrvalsdeildinni en Liverpool-liðið hefur unnið þrjá fyrstu deildarleiki tímabilsins með markatölunni 1-0.

Daniel Sturridge hefur skorað sigurmarkið í öllum þremur leikjunum og getur í kvöld orðið fyrsti leikmaður félagsins í 26 ár til þess að skora í fyrstu fjórum deildarleikjunum en því náði síðast John Aldridge árið 1987. Sturridge hefur skorað 9 mörk í síðustu 8 deildarleikjum sínum.

Simon Mignolet, markvörður Liverpol, getur komist í hóp með Pepe Reina (árið 2005) sem einu markverðir félagsins sem hafa haldið markinu hreinu í fyrstu fjórum deildarleikjunum.

Leikur Swansea og Liverpool hefst klukkan 19.00 og verður í beinni á Stöð 2 Sport sem og á háskerpustöð Stöðvar 2 Sport 2.