Carragher og Neville rökræða um Gerrard og Scholes

„Paul Scholes er besti leikmaður sem ég hef spilað með og ég spilaði með þokkalegum leikmönnum,“ segir sparkspekingurinn Gary Neville.

Neville og Jamie Carragher rökræddu á Sky á dögunum hver væri besti enski miðjumaðurinn af Frank Lampard, Paul Scholes og Steven Gerrard. Gerðu þeir það að beiðni áhorfenda á mánudagsþátt þeirra félaga.

Carragher, sem lék með Gerrard hjá Liverpool, var gallharður á því að Gerrard væri sá besti. Svo Lampard og loks Scholes.

„Gerrard var maður stóru leikjanna eins og í Istanbúl og Cardiff. Lampard er svipaður. Hann skoraði í úrslitaleik Meistaradeildarinnar,“ sagði Carragher og bætti við að Scholes væri þar rétt á eftir.

Neville sagðist ekki vilja bera saman leikmenn en bætti svo við að Scholes væri sá besti sem hann hefði spilað með. Hann var duglegur að verja fyrrum liðsfélaga sinn. Ekki skipti öllu máli að skora mörk heldur að stjórna gangi leiksins.

„Sir Alex Ferguson lagði alla áherslu á að stjórna leiknum. Xavi, Pirlo og Scholes eru ekki markaskorar. Auðvitað skora þeir mörk en þeir stjórna umfram allt gangi leiksins. Hægja á leiknum og auka tempóið þegar þess þarf.“

„Allt fór í gegnum Scholes og hann stjórnaði leiknum,“ sagði Neville og bætti við að Scholes hefði verið límið sem hélt Giggs, Beckham, Keane og Ronaldo saman.

Carragher spurði þá hvers vegna Sven Göran Eriksson, landsliðsþjálfari Englands, hefði sett Scholes á vinstri kantinn en Lampard á miðjuna ásamt Gerrard fyrst Scholes var bestur? Neville var á því að það hefði verið auðveldast fyrir Eriksson að setja Scholes þangað frekar en einhvern annan. Hann ætlaði þó ekki að segja neitt um hvort sú ákvörðun hefði verið rétt eða röng.