Rússar segja flugskeytum skotið frá Miðjarðarhafi

Rússneska varnarmálaráðuneytið segir að á ratsjám hafi sést að tveimur flugskeytum, eða einhverjum ámóta hlutum, hafi fyrir stuttu verið skotið frá Miðjarðarhafinu í átt til lands.

Reuters fréttastofan skýrir frá þessu og vitnar til rússneskra fjölmiðla.

„Flugferill þessara hluta fer frá miðhluta Miðjarðarhafsins í áttina að austurhluta Miðjarðarhafsstrandarinnar,” hefur rússneska fréttastofan eftir talsmanni ráðuneytisins.

Bashar al Assad Sýrlandsforseti sagði í viðtali við franska dagblaðið Le Figaro, sem birtist í dag, að árás á Sýrland muni leiða til allsherjarstríðs fyrir botni Miðjarðarhafs.

Hann varaði sérstaklega frönsku stjórnina við því að taka þátt í hernaði gegn Sýrlandsstjórn: „Ef franska ríkið sýnir sýrlensku þjóðinni fjandskap, þá verður Frakkland óvinur hennar.”

Uppfært klukkan 10.23:

Rússneska RIA-fréttastofan segir flaugarnar hafa lent í hafinu. Þetta kemur fram á vefsíðu breska dagblaðsins The Guardian, sem bætir svo þessari athugasemd við: „Hjúkk!”