Segja að Ronaldo hafi verið í Manchester í dag

Samskiptamiðlar hafa logað seinni partinn eftir að það spurðist út að Cristiano Ronaldo væri staddur í Manchester.

Bæði blaðamaður Sky Sports og Paddy Crerand hjá MUTV, sjónvarpsstöð Man. Utd, segjast hafa heimildir fyrir því að Ronaldo væri í Manchester.

Ronaldo hefur verið orðaður við sitt gamla félag, Man. Utd, í allt sumar og virðist ekki enn vera búið að loka því máli.

Ronaldo á enn eftir að skrifa undir nýjan samning við Real Madrid en núverandi samningur rennur út sumarið 2015.

Svo vakti það athygli að Antonio Valencia skildi hætta að spila í treyju númer 7 en Ronaldo lék í þeirri treyju hjá félaginu.

Ronaldo fékk leyfi til þess að koma til móts við portúgalska landsliðið í kvöld og því geta þessar sögur verið sannar.

Stuðningsmenn Man. Utd halda því enn í vonina um að Ronaldo komi aftur til félagsins.