Átta ára barn lést í ódæðinu

Nú er ljóst að minnst þrír fórust í sprengjuárásum í Boston í Massachusettes í gær. Á meðal þeirra er átta ára gamalll drengur. Yfir 130 særðust í árásinni, þar af 30 lífshættulega og götur í Boylston stræti voru alblóðugar eftir árásirnar.

Frídagur var í Boston í gær og fór Boston maraþon fram þegar sprengjurnar sprungu. Þær voru tvær og sprungu með örskömmu millibili. Þriðja sprengingin varð svo í bókasafni í Boston, en ekki er ljóst hvort að sú sprengja er tengd hinum tveimur. Barack Obama, forseti Bandaríkjanna, sagði í ávarpi sem hann flutti í gærkvöldi að yfirvöld myndu gera allt sem í þeirra valdi stæði til að finna hver stæði að baki ódæðinu. Enginn hefur lýst tilræðunum á hendur sér, en sprengjurnar eru rannsakaðar sem möguleg hryðjuverk.

Hátt í 40 Íslendingar tóku þátt í maraþoninu

Þrjátíu og fimm Íslendingar tóku þátt í maraþoninu í Boston og urðu varir við að sprengjurnar sprungu. Einn þeirra, Magnús Þór Jónsson, sagði í samtali við fréttastofu í gærkvöldi að allir Íslendingarnir væru heilir á húfi. Hann sagði að þau hefðu öll verið beðin um að halda kyrru fyrir á hótelinu sem þau gistu á. Mikil skelfing ríkti í allri borginni og hann hefði aldrei upplifað neitt þessu líkt. Síðar um kvöldið hittust allir Íslendingarnir til þess að fara yfir stöðuna.

Áhrif á fjármálamarkaði

Markaðir í Asíu tóku dýfu í nótt eftir að fréttist af sprengingunum. Hlutabréfavísitölur féllu um tvö prósent og hlutabréf í Suður Kóreu og Ástralíu féllu einnig. Verð á olíu og gulli lækkaði einnig mikið. Markaðir í Bandaríkjunum lækkuðu líka í gærkvöld, en markaðir þar í landi voru um það bil að loka þegar sprengingin varð. 

Myndband af fyrstu sprengingunni, tekið af vef Boston.com