Benitez býst við að klára tímabilið

Rafa Benitez, stjóri Chelsea, lét gamminn geysa eftir bikarleik í vikunni og þar lýsti hann því yfir að hann myndi yfirgefa félagið í lok tímabilsins. Það sem meira er þá lét hann stuðningsmenn heyra það.

Það eru svo sem engin ný tíðindi að hann fari í sumar enda bara með samning út tímabilið. Því er þó spáð núna að hann fái ekki að klára tímabilið enda hafa borist fréttir af óróa í klefanum.

Benitez greindi frá því að þrátt fyrir allt væri samband hans og Roman Abramovich, eiganda Chelsea, gott og hann býst ekki við að fá sparkið fyrir lok tímabilsins.

"Nei, ég á ekki von á því. Stjórnin veit vel hvernig ég vinn og hvað við erum að reyna að gera."