Rodgers: Eðlilegt að Sterling hafi gefið eftir

Eftir flotta byrjun á tímabilinu hefur ungstirnið Raheem Sterling hjá Liverpool gefið talsvert eftir. Stjóri félagsins, Brendan Rodgers, segist hafa átt von á því.

Sterling var kominn í byrjunarlið Liverpool aðeins 17 ára gamall og lék vel í upphafi leiktiðar. Hann var þá einnig valinn í enska landsliðshópinn og spilaði hann sinn fyrsta landsleik síðasta nóvember.

Sterling hefur ekki verið í byrjunarliði Liverpool í síðustu sex leikjum og Rodgers ætlar ekki að setja of mikla pressu á strákinn.

"Þetta er bara ungur strákur þannig að við verðum að passa okkur og taka eitt skref til baka. Deildin reynir mikið á bæði andlegan og líkamlegan styrk," sagði Rodgers.

"Deildin reynir á reynda atvinnumenn og þessi strákur er bara að byrja sinn feril. Það verður að fara vel með slíka drengi og hann þarf að vera alltaf tilbúinn í að læra.

"Ég ræddi málið við hann um daginn. Þó svo hann myndi ekki spila meira í vetur væri þetta flott tímabil hjá honum. Það var viðbúið að hann myndi gefa eftir."