Saha líklega á leiðinni til Suður-Afríku

Franski framherjinn Louis Saha hefur fengið leyfi hjá Sunderland til þess að yfirgefa félagið fyrir lok mánaðarins. Hann gæti verið á leið til Suður-Afríku.

Hinn 34 ára gamli Saha kom til Sunderland í sumar og skrifaði þá undir eins árs samning. Hann hefur enn ekki spilað leik í byrjunarliði í vetur.

Leikmaðurinn er því eðlilega ósáttur og vill losna frá félaginu.

"Við höfum tjáð Louis að hann megi ræða við önnur félög og fara í það lið sem honum hentar. Samningi yrði þá einfaldlega rift," segir í yfirlýsingu Sunderland.

Takmarkaður áhugi er á kröftum Saha og því er Suður-Afríka líklegur áfangastaður í augnablikinu en lið þar ílandi er eina liðið sem hefur sýnt honum áhuga.