Puttinn hans Wilshere inn á borð aganefndar

Aganefnd enska knattspyrnusambandsins hefur ákveðið að taka fyrir hegðun Arsenal-mannsins Jack Wilshere í 3-6 tapinu á móti Manchester City á Etihad-leikvanginum í ensku úrvalsdeildinni um síðustu helgi.

Wilshere var í dag kærður fyrir móðgandi, dónalega og ósvífna handabendingu en hann sýndi stuðningsmönnum Manchester City puttann í miðjum leik. Jack Wilshere var þarna orðinn mjög pirraður enda gekk lítið hjá honum inn á vellinum í þessum leik.

Kæran á Wilshere er frumraun nýrrar reglugerðar þar sem leyft er að taka fyrir atvik sem dómararnir missa af.

Wilshere gæti hugsanlega misst af stórleiknum á móti Chelsea sem fer fram á Þorláksmessukvöld.