Sunderland sló Chelsea út úr deildabikarnum

Varamaðurinn Ki sung-Yueng var hetja Sunderland í kvöld þegar hann skoraði sigurmarkið á móti Chelsea í 2-1 sigri í framlengdum leik í átta liða úrslitum enska deildabikarsins. Sunderland og Manchester City komust áfram í undanúrslit keppninnar í kvöld.  

Ki sung-Yueng, sem er í láni frá Swansea City, kom inn á sem varamaður á 62. mínútu þegar staðan var 1-0 fyrir Chelsea og leikur Sunderland var allt annað en sannfærandi.

Annar varamaður, Fabio Borini, skoraði jöfnunarmarkið tveimur mínútum fyrir lok venjulegs leiktíma og lagði upp sigurmarkið fyrir Ki sung-Yueng sem kom rétt fyrir lok framlengingarinnar.

Chelsea komst í 1-0 eftir sjálfsmark Sunderland-mannsins Lee Cattermole. Markið kom á upphafsmínútu seinni hálfleiksins eftir fyrirgjöf Cesar Azpilicueta og pressu frá Frank Lampard. Það þurfti að beita marklínutækninni til þess að staðfesta það að boltinn fór inn fyrir marklínuna.

Þannig var staðan þar til á 88. mínútu leiksins þegar Fabio Borini, lánsmaður frá Liverpool, jafnaði metin og tryggði Sunderland framlengingu. Jozy Altidore hafði þá skapað mikinn usla í teignum og Borini fylgdi vel á eftir.

Sunderland var miklu betra liðið í framlengingunni og markið var búið að liggja lengi í loftinu þegar Suður-Kóreumaðurinn Sung-Yueng Ki fékk boltann frá Fabio Borini og skoraði af mikilli yfirvegun.

Fyrr í kvöld varð Manchester City fyrsta liðið til að komast í undanúrslitin eftir 3-1 útisigur á b-deildarliði Leicester City.

Hinir tveir leikirnir í átta liða úrslitunum fara fram annað kvöld en þá mætast  Stoke City - Manchester United annarsvegar og Tottenham - West Ham United hinsvegar.