Mancini átti engin svör handa mér

Scott Sinclair var á dögunum lánaður frá Man. City til WBA. Hann átti ekki góða tíma hjá City og er alls ekki sáttur við Roberto Mancini, fyrrum stjóra City.

City keypti Sinclair af Swansea á 6.2 milljónir punda en Sinclair hafði farið á kostum í liði Swansea sem sló eftirminnilega í gegn.

Margir voru á því að þarna hefði Sinclair gert mistök og það reyndist vera rétt. Hann lék aðeins í 190 mínútur í deildinni í fyrra og var oftar en ekki í stúkunni.

"Ég spurði Mancini af því af hverju hann hefði verið að kaupa mig fyrst hann vildi ekki nota mig. Ég gat aldrei sannað mig. Hann átti í rauninni ekkert svar handa mér," sagði Sinclair.

"Ég ræddi nokkrum sinnum við hann og við vorum ekki alltaf sammála. Þannig er fótboltinn. Ég mun hugsa mig tvisvar um næst ef ég fæ tækifæri hjá svona stórliði."