Stoðsendingar Özil skutu Arsenal á toppinn

Arsenal lagði Stoke City að velli 3-1 í ensku úrvalsdeildinni í fótbolta í dag. Með sigrinum tyllti Arsenal sér á topp deildarinnar en Tottenham getur náð liðinu að stigum seinna í dag. Mesut Özil lagði upp öll mörk Arsenal í leiknum.

Aaron Ramsey kom Arsenal yfir strax á 5. mínútu þegar hann fylgdi eftir aukaspyrnu Özil sem Asmir Begovic varði.

Geoff Cameron jafnaði metin á 26. mínútu en tíu mínútum síðar var Arsenal komið yfir á nýjan leik. Özil tók horn sem Per Mertesacker skallaði í hornið fjær og staðan í hálfleik 2-1.

Bacary Sagna skoraði síðasta mark leiksins þegar hann skallaði aukaspyrnu Özil í netið þegar 28 mínútur voru til leiksloka.

Arsenal var mun sterkari aðilinn í leiknum og fékk færi til að vinna enn stærri sigur en það þurfti ekki að þessu sinni og gott gengi Arsenal heldur áfram en liðið hefur nú unnið fjóra leiki í röð.