Van Persie: Get vel spilað með Rooney

Hollenski framherjinn Robin van Persie hjá Englandsmeisturum Manchester United er hæst ánægður með að hafa Wayne Rooney ennþá sér við hlið eftir óvissuna með framtíð enska sóknarmannsins í sumar.

Orðrómur var um að Rooney vildi yfirgefa Manchester United en bæði Chelsea og Arsenal voru orðuð við enska landsliðsmanninn sem hefur skorað yfir 200 mörk fyrir félagið.

Robin van Persie var markahæsti leikmaður síðustu leiktíðar og hefur haldið uppteknum hætti í upphafi þessarar. Hollendingurinn segir ekkert því til fyrirstöðu að hann og Rooney geti ekki náð enn betur saman í fremstu víglínu Manchester United.

„Ég held að allir geti séð að við Wayne viljum leika saman, að við leitum mikið af hvorum öðrum inni á vellinum.

„Hann hefði getað skotið á móti Bayer Leverkusen á þriðjudagskvöldið en reyndi frekar að senda á mig. Hann var ekki að reyna að skora sjálfur. Svona gengur þetta í báðar áttir. Við getum náð enn betur saman og sent á hvorn annan og fyrir vikið báðir skorað mörg mörk í vetur.

„Ég er mjög ánæður við hlið hans, okkur finnst frábært að leika saman. Við erum ekki ólíkir leikmenn hvað það varðar að við erum báðir alhliða framherjar. Við getum báðir fallið til baka og sótt boltannn og líka sótt inn fyrir vörnina.

„Við getum báðir gefið boltann og það finnst mér frábært. Það er frábært að leika með Wayne því hann hefur þetta allt. Ef við höldum áfram að ná svona vel saman eigum við eftir að bæta okkur og ná enn betur saman,“ sagði van Persie.

Manchester United tekur á móti nágrönum sínum í Manchester City í beinni útsendingu á Stöð 2 Sport 2 klukkan 14:45 í dag.