Mark Gylfa dugði ekki til gegn Chelsea

Tottenham komst í dag í toppsæti ensku úrvalsdeildarinnar er liðið gerði 1-1 jafntefli gegn Chelsea. Gylfi Þór Sigurðsson á skotskónum fyrir Spurs en Mata breytti öllu hjá Chelsea.

Það var Gylfi Þór sem skoraði fyrsta mark leiksins. Christian Eriksen sendi inn í teiginn á Roberto Soldado sem renndi boltanum á Gylfa sem kom með gott hlaup í teiginn.

Gylfi lék á John Terry og kláraði svo færið af harðfylgi með skoti í nærhornið. Smekklegt mark.

Tottenham var mun sterkara liðið á meðan Chelsea skapaði sér ekki nokkurn skapaðan hlut. 1-0 í hálfleik.

Juan Mata kom af bekknum hjá Chelsea í hálfleik. Loksins, loksins sögðu einhverjir en Mata hefur nánast verið frystur í allan vetur.

Mata hleypti miklu lífi í leik Chelsea og hann lagði upp jöfnunarmarkið. Aukaspyrna í teiginn sem Terry skallaði auðveldlega í netið.

Chelsea var með tök á leiknum en tíu mínútum fyrir leikslok fækkaði í liði þeirra. Fernando Torres var rekinn af velli með sitt annað gula spjald. Fór þá of harkalega upp í skallaeinvígi við Vertonghen.

Gylfi var ekki fjarri því að tryggja Tottenham sigurinn skömmu fyrir leikslok. Átti þá frábært skot sem fór rétt fram hjá markinu.

Nær komst Spurs ekki og liðin skiptu því með sér stigunum.

Hér má sjá mark Gylfa Þórs í leiknum.

Staðan í ensku úrvalsdeildinni.