Villas-Boas: Gott að fá tíu stig yfir hátíðirnar

„Við gerðum vel í að fara í gegnum hátíðirnar með 10 stig í fjórum leikjum og vonandi höldum við áfram á þessari braut og komumst í þá stöðu sem við viljum vera í,“ sagði Andre Villas-Boas knattspyrnustjóri Tottenham eftir 3-1 sigurinn á Reading í dag.

Aaron Lennon átti frábæran leik fyrir Tottenham og hrósaði Villas-Boas honum sérstaklega eftir leikinn.

„Aaron Lennon er frábær leikmaður og fær ekki alltaf það hrós sem hann á skilið en hann hefur leikið frábærlega fyrir okkur,“ sagði Villas-Boas.

Brian McDermott þjálfari Reading var svekktur yfir jöfnunarmarki Tottenham í leiknum þegar Michael Dawson skallaði hornspyrnu Gylfa Þórs Sigurðssonar í netið.

„Það er svekkjandi að fá á sig mark svo snemma eftir að við komumst yfir og ef við hefðum verið 1-0 yfir í hálfleik þá hefði þetta verið mjög góður leikur.

„Andre er búinn að byggja upp mjög gott lið hjá Tottenham og það munu ekki margir sækja stig hingað,“ sagði McDermott.