Dyer skoraði og borinn útaf

Norwich og Swansea skildu jöfn 1-1 í ensku úrvalsdeildinni í fótbolta í dag. Bæði mörkin voru skoruð í fyrri hálfleik. Nathan Dyer skoraði fyrir Swansea og var borinn af leikvelli síðar í leiknum, líklega ökklabrotinn.

Dyer skoraði strax á 12. mínútu eftir langa sendingu Ashley Williams. Þegar skammt var eftir af fyrri hálfleik var Dyer borinn af leikvelli en enn á eftir að staðfesta eðli meiðslanna en talið er líklegt að hægri ökklinn sé brotinn.

Gary Hooper jafnaði metin á fjórðu mínútu uppbótartíma fyrri hálfleiks með glæsilegu skoti af rúmlega 20 metra færi og þar við sat.

Swansea er enn í 10. sæti deildarinnar en Norwich fór upp fyrir Cardiff City og er í 14. sæti, fimm stigum frá fallsæti.