Moyes: Ferguson skiptir sér ekki af

David Moyes, stjóri Manchester United, segir það ekki rétt að Alex Ferguson sé að stjórna málum á bak við tjöldin hjá félaginu.

Roy Keane hélt því fram í viðtali sem birtist í heimildamynd á dögunum. Keane, sem lék undir stjórn Ferguson á sínum tíma, sagði að Ferguson liti svo stórt á sig að hann ætti erfitt með að sleppa tökunum.

Ferguson hætti sem knattspyrnustjóri United síðastliðið vor eftir 26 ár í starfi og ótrúlega velgengni.

„Sir Alex hefur reynst mér ótrúlega hjálpsamur. Það er það eina sem ég get sagt,“ sagði Moyes í samtali við enska fjölmiðla. „Ég þarf bara að hringja í hann til að fá aðstoð eða ráðgjöf. Hann hefur verið mjög góður.“

„Hann er ekki mikið á svæðinu. Hann kemur á leikina en það er eðlilegt, miðað við að hann er í stjórninni. Við heilsumst eftir leiki en hann kemur ekki inn í búningsklefann.“