Sahin á leið til Arsenal

Spænskir fjölmiðlar fullyrtu í gærkvöld að Tyrkinn, Nuri Sahin, væri á leið til Arsenal á lánsamningi. Sahin kom til Real Madrid frá Borussia Dortmund fyrir síðasta tímabil en hefur ekki náð að festa sig í sessi hjá liðinu vegna meiðsla.

Jose Mourinho, knattspyrnustjóri Real Madrid lítur jákvætt á lánsamning Sahin enda hefur hann ekki fengið mörg tækifæri hjá liðinu þegar hann er heill heilsu.

Arsenal hefur sýnt lit í leikmannakaupum að undanförnu en Sahin yrði þá þriðji leikmaðurinn sem liðið fengi til liðs við sig í sumar. Arsenal hefur m.a nælt sér í Lukas Podolski og Oliver Giroud sem keyptir voru til þess að styrkja sóknarleik liðsins.

Einnig hefur verið mikið rætt um félagsskipti Santi Cazorla frá Malaga til Arsenal en leikmaðurinn á að hafa gengist í gegnum læknisskoðun hjá félaginu á dögunum og því einungis formsatriði að félagsskiptin gangi í gegn.