Robin van Persie hetja United gegn City

Manchester United vann ótrúlegan sigur, 3-2, á Manchester City á heimavelli City. Rooney skoraði fyrstu tvö mörk leiksins en Man. City neitaði að gefast upp og náðu að jafna metin í síðari hálfleik.

Það var síðan Robin van Persie sem skoraði sigurmark United í uppbótartíma. Manchester City byrjaði leikinn mun betur og voru mikið meira með boltann en fyrsta mark leiksins kom því í raun gegn gangi leiksins þegar Wayne Rooney skoraði fyrsta mark leiksins eftir rúmlega korters leik en hann fékk boltann rétt fyrir utan vítateig City og renndi honum laust í markhornið.

Rooney var síðan aftur á ferðinni þegar tæplega hálftími var liðin af leiknum þegar hann skoraði frábært mark af stuttu færi eftir fyrirgjöf frá Rafael. Staðan var því 2-0 í hálfleik og útlitið gott hjá gestunum.

Ashley Young skoraði síðan þriðja mark United á 59. mínútu en það var dæmt af vegna rangstöðu og það ranglega.

City brunaði þá í sókn og Yaya Touré minnkaði síðan muninn fyrir heimamenn og allt varð vitlaust í Manchester. Heimamenn lögðu allt í það að jafna metin og það gekk eftir fjórum mínútum fyrir leikslok þegar Pablo Zabaleta þrumaði boltanum í netið rétt fyrir utan vítateig.

Það stefndi í meistarajafntefli en það var Hollendingurinn Robin van Persie sem tryggði gestunum stigin þrjú þegar hann skoraði beint í úr aukaspyrnu á 92. mínútu leiksins.

Niðurstaðan ótrúlegur sigur Manchester United sem er komið með 6 stiga forskot á toppi deildarinnar en City er í því öðru.

Staðan í ensku úrvalsdeildinni.