Benitez skrifaði bréf til stuðningsmanna Chelsea

Rafa Benitez, stjóri Chelsea, ætlar sér ekki að gefast upp á því að vinna stuðningsmenn Chelsea á sitt band. Þeir hafa baulað látlaust á hann síðan hann tók við liðinu af Roberto di Matteo.

Hann hefur nú skrifað opið bréf til stuðningsmanna félagsins þar sem hann segist ætla að leggja mikið á sig til þess að ná árangri með liðið.

"Frá þeirri stundu sem ég skrifaði undir samninginn hef ég, og mínir aðstoðarmenn, unnið linnulaust að því að ná réttum úrslitum. Okkur er alveg sama hversu mikið við þurfum að vinna og hversu miklu við þurfum að fórna. Við ætlum okkur að ná árangri," skrifar Benitez.

"Það hefur nánast ekkert verið hægt að æfa út af leikjaálagi hingað til. Ég veit samt að strákarnir í liðinu eru að vinna að heilum hug. Nú er það HM félagsliða þar sem við ætlum að vinna bikarinn.

"Það var mikil áskorun fyrir mig að taka þetta starf að mér. Ég vil þakka fyrir þann stuðning sem ég hef fengið og ítreka að ég mun vinna starf mitt heiðarlega og af fullum krafti meðan ég er hérna."