Mancini: Balotelli verður að fara að hugsa um vinnuna sína

Roberto Mancini, stjóri Man. City, var allt annað en sáttur við landa sinn, Mario Balotelli, sem rauk inn til búningsherbergja er honum var skipt af velli í borgarslagnum í dag.

Mancini ákvað að taka Balotelli fram yfir Carlos Tevez í dag en sú áhætta borgaði sig ekki. Balotelli var tekinn af velli snemma í síðari hálfleik. Þá var hann nýbúinn að reyna að kæruleysislega hælsendingu sem fór í taugarnar á stjóranum. Hann brást við með því að taka Balotelli af velli.

"Ég elska Mario en það er mikilvægt að hann fari að hugsa um vinnuna sína. Hann hefur allt til að bera en hann getur ekki spilað eins og hann gerði í dag. Við vildum fá miklu meira frá honum," sagði Mancini.

"Þegar leikmaður hefur hæfileika eins og Mario er ótrúlegt að fylgjast með honum kasta hæfileikum sínum á glæ. Ég hef séð marga hæfileikaríka leikmenn um ævina sem gerðu ekkert við sína hæfileika. Ég vil ekki að Mario verði einn þeirra."

Þó svo Balotelli hafi strunsað inn í klefa kom hann aftur til baka síðar og kláraði leikinn á bekknum með félögum sínum. Hann hefur aðeins skorað þrjú mörk í vetur.