Crouch: Það er eins gott að ég er giftur

Peter Crouch, leikmaður Stoke, fékk heldur betur að kenna á því í leik gegn Newcastle á dögunum. Þá fékk hann högg frá Fabricio Coloccini sem leiddi til þess að hann missti tvær tennur. Síðasta vika hefur síðan verið ansi erfið fyrir Crouch.

"Þetta er búin að vera hræðilega vika. Tennurnar duttu hreinlega í hendina á mér. Sem betur fer var tannlæknir í stúkunni. Ársmiðahafi sem brást hratt og vel við. Hann bjargaði þessu. Ég var farinn að óttast að líta út eins og Joe Jordan," sagði Crouch léttur en hann þarf að vera með spangir núna og í framtíðinni þarf hann líka að spila með góm.

"Eiginkonan hefur vorkennt mér mikið. Ég sagði við hana að það væri eins gott að ég sé giftur. Ég myndi ekki standa mig vel á markaðnum svoan tannlaus."

Varðandi skotið á Joe Jordan, fyrrum leikmann Leeds, þá missti hann tennur en fékk nýjar. Hann tók þær aftur á móti úr sér er hann spilaði.