PSG við það að stela Lucas Moura af Manchester United

Paris Saint Germain er búið að bjóða 45 milljónir evra í Brasilíumanninn Lucas Moura eða svo segir Massimo Moratti, forseti Inter Milan í viðtali við Sky Sports. Manchester United var nálægt því að ganga frá kaupum Lucas Moura en nú virðist franska félagið ætla að stela brasilíska framherjanum af United-mönnum.

Lucas Moura spilar með Sao Paulo og viðræðurnar við Manchester United hafa gengið hægt þar sem að enska félagið er ekki tilbúið að borga 40 milljónir evra fyrir leikmanninn. Frakkarnir ætla að því virðist að nýta sér það.

Massimo Moratti segist ekki geta keppt við Paris Saint Germain og það séu enginn rök á bak við það að bjóða svona mikið í leikmann eins og Lucas Moura. Lucas Moura er 19 ára og 173 sm sóknarmiðjumaður eða kantmaður sem á enn eftir að sanna sig í evrópska fótboltanum.

Lucas Moura er þessa stundina upptekinn með brasilíska Ólympíuliðinu í London en meðal liðsfélaga hans þar er Thiago Silva sem nýverið gekk til liðs við Paris Saint Germain frá AC Milan.