Toppslagur í skugga deilna

Morgundagurinn verður þéttpakkaður í ensku úrvalsdeildinni en augu flestra munu beinast að tveimur leikjum. Annars vegar að borgarslag Everton og Liverpool á heimavelli fyrrnefnda liðsins og hins vegar stórslag toppliðs Chelsea og Manchester United.

Umfjöllun enskra fjölmiðla hefur þó ekki aðeins beinst að knattspyrnunni heldur að stórum hluta að þeim fjölmörgu kynþáttadeilum sem virðast skjóta upp kollinum með reglulegu millibili í knattspyrnuheiminum. Sú deila sem vakið hefur langmesta athygli hófst fyrir ári síðan þegar að John Terry, fyrirliði Chelsea, hafði niðrandi orð um Anton Ferdinand, leikmann QPR.

Bann og sektirTerry verður í banni í leiknum á morgun en málefni hans hafa verið helsta umfjöllunarefni enskra fjölmiðla síðustu vikurnar. Hann var nýlega úrskurðaður í fjögurra leikja bann fyrir orð sín en Anton er bróðir Rio Ferdinand, varnarmanns Manchester United.

Mál þetta hefur haft gríðarleg áhrif á enska knattspyrnu. Terry er hættur að spila með landsliðinu, Ashley Cole var sektaður og ávíttur af enska knattspyrnusambandinu fyrir reiðiskrif sín á Twitter vegna málsins og Rio Ferdinand sömuleiðis fyrir að saka Cole um að vera „hvítan að innan". Þá hafa fjölmargir aðrir knattspyrnumenn látið sig málið varða.

Nú stendur yfir átak í ensku úrvalsdeildinni sem nefnist „Kick It Out" og beinist gegn kynþáttafordómum. Jason Roberts, framherji Reading, reið á vaðið þegar hann kom opinberlega fram og neitaði að klæðast bol í upphitun eins og ætlast var til af leikmönnum liða í deildinni. Roberts fannst refsing Terry of væg og vildi vekja athygli á því með athæfi sínu.

BrottrekstrarsökÞeir Ferdinand-bræður fóru að fordæmi Roberts um síðustu helgi og það gerðu einnig fleiri þeldökkir knattspyrnumenn í Englandi. Málið hefur komið af stað mikilli umræðu um kynþáttafordóma í enskri knattspyrnu og ekki minnkaði hún þegar að þeldökkir leikmenn enska U-21 landsliðsins voru úthrópaðir í leik í Serbíu fyrr í mánuðinum.

Nú hafa samtök knattspyrnumanna í Englandi tilkynnt sex þrepa áætlun sem ætluð er til að taka harðar á kynþáttafordómum. Þar á meðal að hægt verði að reka leikmenn (og þjálfara) sem verða uppvísir að kynþáttaníði.

Við munum fara að lögunum„Ef meirihluta félaga finnst að við þurfum lög eins og þessi munum við að sjálfsögðu fylgja þeim," sagði Roberto Di Matteo, knattspyrnustjóri Chelsea, á blaðamannafundi í gær.

Chelsea hefur verið gagnrýnt fyrir að taka of vægt á John Terry en hann var aðeins sektaður. Ekki er búist við öðru en að Terry fái aftur fyrirliðabandið þegar hann hefur tekið út sína refsingu.

Leikmenn Chelsea munu klæðast „Kick It Out"-bolunum fyrir leikinn á morgun og þá hafa enskir fjölmiðlar greint frá því að Ferdinand-bræður séu nú reiðubúnir að taka í hönd þeirra Terry og Cole. Þeir virðast því reiðubúnir að ná ákveðnum sáttum í þessari tiltekinni deilu.

Fleiri aðgerða er þörfHvort leikur Chelsea og Manchester United á morgun markar einhvers konar kaflaskil í þessu máli er óvíst. Þó er líklegt að umræðan muni halda áfram. Ekki er þó búist við öðru en að Rio Ferdinand fái óblíðar móttökur hjá stuðningsmönnum Chelsea, rétt eins og í leik liðanna í febrúar þegar liðin skildu jöfn, 3-3.

Alex Ferguson, stjóri United, er þó þeirrar skoðunar að fleiri aðgerða er þörf og þá sérstaklega að hálfu knattspyrnuyfirvalda.

„Rio og Anton gerðu rétt," sagði hann og átti við sameiginlega yfirlýsingu þeirra fyrr í vikunni þar sem þeir sögðu að meira þyrfti til í baráttunni gegn kynþáttafordómum.

„Kynþáttamálið kraumar enn undir yfirborðinu og er ekki alveg farið í burtu. Vitundarvakningin verður sífellt meiri. Leikmannasamtökin eru að gera sitt besta en UEFA, FIFA og enska knattspyrnusambandið þurfa að gera meira."