Hundruð manna án heimilis

Í Bretlandi hefur ekki rignt jafn mikið í september í þrjátíu ár. Í norðurhluta Englands hafa hundruð manna þurft að forða sér að heiman, eða að minnsta kosti að koma sér fyrir á efri hæðum húsa, meðan mestu flóðin ganga yfir.

Spáð er úrhellisrigningu áfram og fólk beðið um að hafa varann á.

Tryggingafélög eru strax byrjuð að meta tjónið, og almannavarnir hafa nóg að gera við að aðstoða fólk sem komist hefur í hann krappan.

Ástandið er verst í norðanverðu landinu, en úrkoman er að færast suður eftir og vekur íbúum þar ugg.

Sums staðar hafði flóðavatnið náð eins metra hæð, með skelfilegum afleiðingum fyrir íbúa í kjöllurum og á fyrstu hæð húsa.- gb