Kári eftirsóttur

Steve Evans, stjóri enska D-deildarliðsins Rotherham, segir að félaginu hafi borist fyrirspurnir vegna Kára Árnasonar áður en keppnistímabilið hófst.

Kári kom til liðsins í sumar frá Aberdeen í Skotlandi og vakti athygli fyrir góða frammistöðu á undirbúningstímabilinu.

„Kári hefur verið hreint frábær á undirbúningstímabilinu og þess vegna fengum við símtöl vegna hans. En ég efast um að nokkur sé á leið frá félaginu – ekki nema það henti okkur," sagði Evans.

„Áhuginn mun aukast. Honum stóð til boða að semja við sex félög í Skotlandi og tvö í ensku B-deildinni. En hann ákvað að koma hingað og vonandi getur hann farið með okkur upp."