Mexíkó vann á Wembley - bið Brasilíu eftir Ólympíugulli lengist enn

Mexíkó kom flestum á óvart með því að vinna 2-1 sigur á Brasilíu í úrslitaleik knattspyrnukeppni karla á Ólympíuleikunum í London en úrslitaleikurinn fór fram á Wembley í dag. Mexíkó lék án sinnar stærstu stjörnu, Giovani Dos Santos, sem gat ekki spilað vegna meiðsla, en það kom ekki að sök og mexíkóska liðið vann nokkuð sannfærandi sigur eftir að hafa skorað fyrra markið sitt eftir aðeins 28 sekúndna leik.

Brasilíumenn hafa unnið fimm heimsmeistaratitla en aldrei unnið Ólympíugull. Liðið var búið að raða inn mörkum á leikunum, 15 mörk í 5 leikjum, en sóknarmenn Brasilíu komust lítið áleiðis í úrslitaleiknum og skoruðu ekki fyrr en í uppbótartíma leiksins.

Oribe Peralta, 28 ára gamall framherji Santos Laguna í heimalandinu, var hetja sinna manna í dag því hann skoraði bæði mörk liðsins. Þetta er í fyrsta sinn sem Mexíkó vinnur gull í fótbolta á Ólympíuleikum og jafnframt fyrsta gull þjóðarinnar á leikunum í London.

Mexíkó fékk sannkallaða draumabyrjun í leiknum þegar Oribe Peralta skoraði eftir aðeins 28 sekúndur. Rafael da Silva, leikmaður Manchester United, gerði þá skelfileg mistök og tapaði boltanum fyrir framan eigin vítateig. Oribe Peralta nýtti sér það og skoraði með hnitmiðaðu skoti rétt utan teigs.

Oribe Peralta bætti við öðru marki sínu með skalla á 75. mínútu eftir hornspyrnu en Brassarnir gátu þakkað fyrir að vera ekki búnir að fá á sig fleiri mörk þegar Peralta skoraði annað markið sitt.

Hulk náði að minnka muninn á fyrstu mínútu uppbótartíma eftir að hafa sloppið í gegnum vörn Mexíkóbúa en hann hafði komið inn á sem varamaður í fyrri hálfleiknum. Brasilíumenn pressuðu stíft á lokasekúndunum og Oscar, nýr leikmaður Chelsea, fékk algjört dauðafæri en skallaði yfir af markteig. Mexíkóska liðið hélt út og landaði gullinu sem Brassar geta bara ekki unnið.