Williams sleppur við refsingu | Sparkaði í Van Persie

Ashley Williams, varnarmaður Swansea í ensku úrvalsdeildinni, fær enga refsingu fyrir að sparka knettinum í höfuð Robin van Persie, leikmanns Manchester United, í viðureign liðanna á Þorláksmessu.

Málavextir voru þeir að brotið var á Van Persie þar sem hann reyndi að brjóta sér leið í gegnum vörn Swansea. Hollendingurinn féll til jarðara og dómari leiksins flautaði. Boltinn barst til Williams sem spyrni boltanum af miklu afli beint í hnakkann á Van Persie sem brást illa við.

Dómari leiksins spjaldaði báða leikmenn fyrir sinn þátt í atvikinu. Van Persie taldi um viljaverk að ræða en Williams hélt fram sakleysi sínu í viðtali eftir leikinn. Enska knattspyrnusambandið mun ekki skoða atvikið frekar.

Sir Alex Ferguson, stjóri United, fór mikinn í viðtali eftir leikinn. Hann taldi að Williams ætti að fara í leikbann því höfuðhöggið hefði getað orðið Hollendingum að bana. Roberto Martinez, stjóri Swansea, sagðist hins vegar ekki einu sinni þurfa að sjá atvikið aftur. Svo viss væri hann um að um óviljaverk hefði verið að ræða.

Brendan Rodgers, sem stýrði Swansea á síðustu leiktíð, Harry Redknapp hjá QPR og Alan Pardew, stjóri Newcastle, hafa allir tjáð sig um málið. Eru þeir á einu máli um að um óviljaverk hafi verið að ræða.