Aðeins eitt lið hefur bjargað sér eftir að hafa verið neðst um jólin

Lið sem verma botnsætið í ensku úrvalsdeildinni yfir jólin þykja ekki líkleg til þess að bjarga sér. Frá stofnári úrvalsdeildarinnar 1992 hefur aðeins einu liði tekist að bjarga sér frá falli eftir að hafa verið í neðsta sæti um jólin.

Sigur QPR á Fulham fyrir rúmri viku sá til þess að liðið lyfti sér upp fyrir nýliða Reading sem sitja fyrir vikið einir á botni deildarinnar með níu stig. Útlitið er ekki gott hjá Brian McDermott og félögum hjá Reading.

West Brom er undantekningin sem sannar regluna hvað álögin sem hvíla á botnsætinu varðar. West Brom tókst á ótrúlegan hátt að bjarga sér frá falli á lokadeginum tímabilið 2004-2005 eftir að hafa verið í botnsætinu um jólin.

Reading er sem stendur með níu stig í neðsta sætinu. Q.P.R. er í næstneðsta sæti með tíu stig en Southampton og Wigan hafa fimmtán stig.