Eru engir hommar í enska boltanum?

Nýlega var frumsýnd heimildarmyndin „Britain's gay footballers" á BBC 3 sjónvarpstöðinni á Bretlandseyjum. Í myndinni leitar hin 23 ára Amal Fashanu að samkynhneigðum atvinnumönnum í knattspyrnu en það reynist henni þrautinni þyngri.

Fashanu reynir hvað hún getur að ná tali af leikmönnum í ensku úrvalsdeildinni sem sýna engan áhuga á að ræða við hana um samkynhneigð í knattspyrnu. Joey Barton, leikmaður QPR, samþykkir þó að ræða um málið og sýnir á sér einlæga og allt aðra hlið en hann er þekktur fyrir á knattspyrnuvellinum.

Fashanu fer á leik Brighton Hove & Albion gegn Leeds í Championship-deildinni. Margir af íbúum Brighton eru samkynhneigðir og syngja stuðningsmenn gestaliðsins oftar en ekki söngva þar sem gert er grín að samkynhneigð. Þá mælir Fashanu sér mót við leikarann Matt Lucas úr sjónvarpsþáttunum „Little Britain" en Lucas er samkynhneigður og dyggur stuðningsmaður Arsenal.

Eini opinberi samkynhneigði knattspyrnumaður dagsins í dag, Anton Hysen sem spilar í 4. deild sænska boltans, er heimsóttur. Þá ræðir Fashanu við leikmenn Lundúnarliðsins Millwall um hvernig þeir myndu bregðast við ef liðsfélagi þeirra kæmi út úr skápnum.

Amal Fashanu er frænka Justins heitins Fashanu sem svipti sig lífi árið 1998. Fashanu var fyrsti atvinnumaðurinn í knattspyrnu til að koma út úr skápnum. Enginn hefur fetað í fótspor hans síðan. Hann þótti afar hæfileikaríkur knattspyrnumaður og fyrsti blökkumaðurinn sem var keyptur á eina milljón punda.

Óhætt er að segja að John Fashanu, bróðir Justin og faðir Amal, hafi ekki sýnt kynhneigð bróður síns mikinn skilning á sínum tíma. Amal sest niður með föður sínum í myndinni og ræðir við hann um ástæður þess og hvort hann sjái eftir viðbrögðum sínum.

Hægt er að horfa á myndina í fjórum hlutum á youtube.

Fyrsti hluti

Annar hluti

Þriðji hluti

Fjórði hluti