Moyes: Missti af Hazard

David Moyes, knattspyrnustjóri Everton, segir að hann hafi misst af því að klófesta Eden Hazard þegar hann var yngri hjá Lille í Frakklandi. Belginn leikur í dag hjá Chelsea en hann var keyptur á 32 milljónir punda í sumar.

„Við vissum allt um Hazard í gegnum Marouane Fellaini og belgísku strákana. Við vissum hins vegar að hann væri of dýr fyrir okkur - við höfum nokkrum sinnum lent í því," segir Moyes.

Hazard, sem er 21 árs gamall, fór ungur að vekja athygli en Moyes var á höttunum á eftir honum þegar hann var að stíga sín fyrstu skref í aðalliði Lille. Moyes hefur í gegnum tíðina þótt einkar klókur í leikmannakaupum þrátt fyrir að hafa lítið á milli handanna.