Downing vill ekki fara frá Liverpool

Hlutirnir hafa breyst svolítið hjá Stewart Downing. Fyrir nokkru síðan leit út fyrir að hann færi frá Liverpool i janúar en fátt bendir til þess núna.

Downing hefur loksins verið að finna sig í búningi Liverpool upp á síðkastið og sjálfur hefur hann engan áhuga á því að fara.

"Ég vildi aldrei fara frá félaginu en það var ekki mitt að ákveða það. Ég var ekki í liðinu og mjög pirraður. Þá sagði ég eitthvað um að ég myndi skoða önnur lið. Þá hélt ég að það væri klárt að ég myndi fara annað í janúar," sagði Downing.

"Ég var svolítið hissa þegar stjórinn sagði að ég mætti fara. Hann hafði nefnilega sagt áður að hann væri svo ánægður með mig í upphafi tímabilsins. Þetta var hálfruglingslegt. Þetta var samt spark í afturendann. Ég hafði engu að tapa lengur og það hefur kannski hjálpað minni spilamennsku. Vonandi hef ég staðið mig nógu vel til að vera áfram."