Wilshere nuðar í Walcott um að skrifa undir

Jack Wilshere er vongóður um að félagi sinn hjá Arsenal, Theo Walcott, skrifi undir nýjan samning við félagið og haldi tryggð við félagið sem er að byggja upp nýtt lið.

Wilshere er einn fimm leikmanna sem hefur skrifað undir nýjan langtímasamning við Arsenal og Wilshere vill að Walcott geri slíkt hið sama.

"Það vilja allir hjá félaginu halda Theo. Ég er alltaf að hvetja hann til þess að skrifa undir nýjan samning. Djöflast alveg í honum," sagði Wilshere.

"Theo hefur staðið sig frábærlega og hann veit að hann er mikilvægur fyrir okkur og stuðningsmennina. Það eru fimm breskir strákar búnir að semja og vonandi verður hann sá sjötti.

"Við bresku strákarnir erum allir fínir vinir. Við skemmtum okkur saman, borðum saman og við sitjum saman á ferðalögum. Við viljum ekki missa Theo úr klíkunni."