Sky Sports: Gylfi Þór kynntur sem leikmaður Tottenham á næstu 24 tímum

Sky Sports fréttastofan segir frá því í kvöld að íslenski landsliðsmaðurinn Gylfi Þór Sigurðsson muni ganga til liðs við Tottenham og verði kynntur sem nýr leikmaður Lundúnaliðsins á næstu 24 tímum. Gylfi verður samkvæmt heimildum Sky Sports þar með fyrstu kaup Andre Villas-Boas en Portúgalinn var ráðinn stjóri Spurs í dag.

Tottenham og Liverpool hafa bæði verið orðuð við Gylfa á síðustu dögum en Brendan Rodgers, fyrrum stjóri hans hjá Reading og Swansea, er tekinn við sem stjóri Liverpool. Gylfi gerði góða hluti á lánsamning hjá Swansea á síðustu leiktíð og skoraði meðal annars eitt mark á móti Tottenham.

Sky Sports segir frá því að Tottenham sé búið að semja um kaupverð við Hoffenheim sem og að Gylfi sé bæði búinn að standast læknisskoðun hjá Spurs og semja um kaup og kjör sín á White Hart Lane.

Gylfi Þór skoraði 7 mörk og gaf 5 stoðsendingar í 18 leikjum með Swansea í ensku úrvalsdeildinni á síðustu leiktíð en hann var valinn besti leikmaður deildarinnar í marsmánuði.