Arsenal í þriðja sætið eftir nauman sigur á Wigan

Mikel Arteta skoraði sigurmark Arsenal úr vítaspyrnu þegar liðið heimsótti Wigan í hádegisleiknum í ensku úrvalsdeildinni í knattspyrnu í dag. Með sigrinum komst Arsenal upp í 3. sæti deildarinnar tímabundið hið minnsta.

Fyrri hálfleikur var tíðindalítill með eindæmum. Alex Oxlade-Chamberlain fékk besta færi gestanna en Al Habsi varði skot hans úr teignum nokkuð þægilega.

Arouna Kone fékk langbesta færið í fyrri hálfleiknum. Þá sendi Argentínumaðurinn Franco Di Santo frábæra sendingu inn á Kone en vinstri fótar skot hans fór langt framhjá markinu.

Theo Walcott fékk dauðafæri á 49. mínútu til að koma gestunum yfir en Al Habsi varði máttlaust skot hans af stuttu færi auðveldlega. Walcott kom aftur við sögu skömmu síðar.

Enski kantmaðurinn, sem lék í stöðu framherja í dag líkt og í sigurleiknum gegn Reading, féll þá auðveldlega í teignum. Vítaspyrna var dæmd og Mikel Arteta skoraði sigurmarkið úr spyrnunni.

Wigan sótti án þess að skapa sér dauðafæri og Arsenal nældi því í öll þrjú stigin.

Arsenal er komið í 3. sæti deildarinnar með 30 stig. Chelsea og Tottenham eru stigi á eftir og eiga leik til góða. Wigan er með 15 stig í 18. sætiæ deildarinnar.