Liverpool vann stórsigur | Downing skoraði og lagði upp

Liverpool vann öruggan 4-0 sigur á Fulham í viðureign liðanna í ensku úvalsdeildinni í knattspyrnu í dag.

Martin Skrtel kom heimamönnum yfir á 8. mínútu með hörkuskoti af stuttu færi eftir sendingu Steven Gerrard. Gerrard var svo sjálfur á ferðinni á 36. mínútu þegar hann skoraði eftir frábæra sendingu Stewart Downing.

Þetta var fyrsta stoðsending Downing í 45 úrvalsdeildarleikjum fyrir Liverpool og dagurinn hans átti aðeins eftir að verða betri. Downing skoraði sjálfur á 52. mínútu eftir undirbúning Gerrard og heimamenn í jólaskapi á Anfield.

Það var svo Luis Suarez sem tryggði öruggan sigur heimamanna með marki í viðbótartíma eftir undirbúning Jose Enrique.

Með sigrinum skaust Liverpool upp fyrir Stoke og í 8. sæti deildarinnar. Liverpool hefur 25 stig líkt og Stoke og Norwich en betri markatölu.

Staðan í ensku úrvalsdeildinni.