Mancini: Hjartað er ekki nógu sterkt fyrir síðbúin mörk

Roberto Mancini, knattspyrnustjóri Manchester city, vill að leikmenn sínir skori fyrr í leikjum. City lagði Reading að velli 1-0 í dag með marki Gareth Barry í viðbótartíma.

„Það skiptir meira máli að skora snemma í svona leikjum. Hjartað mitt er ekki nógu sterkt fyrir svona síðbúin mörk," sagði Mancini og brosti eftir sigurinn.

„Mér fannst við eiga sigurinn skilinn," sagði Mancini sem var ánægður með úrslitin og hrósaði varnarleik Reading.

„Við þurftum að sýna styrk okkar því þeir vörðust mjög vel með marga leikmenn fyrir aftan boltann. Við áttum í vandræðum með að skapa okkur svæði," sagði Mancini.

Þetta er í fjórða skiptið á leiktíðinni sem City skorar sigurmark eftir 87. mínútu leiksins.