Hundrað ára gömul ljósapera virkar enn

Ljósapera sem legið hefur í hornsteini í Cleveland í Bandaríkjunum í hundrað ár virkar enn.

Bandaríska stórfyrirtækið General Electric fagnar nú 100 ára afmæli Nela Park verkefnisins. Nela Park sá um þróun ljósabúnaðar fyrir fyrirtækið og hannaði þar á meðal ljósaperur.

Við stofnun Nela Park á síðustu öld var upplýsingahylki komið fyrir í hornsteini við höfuðstöðvar þess.

Í hylkinu voru ljósmyndir af stofnendum Nela Park ásamt dagbókum þeirra. Fimm ljósaperur voru einnig grafnar í hornsteininn.

Hylkið var fjarlægt úr hornsteininum í gær og það vakti mikla athygli að ein ljósaperan virtist vera í lagi.

Rannsóknarmönnum tókst síðan að kveikja á ljósaperunni stuttu seinna. Hún hefur nú verið flutt á rannsóknarstofu General Electric.