Tottenham upp í fjórða sætið með sigri á Swansea

Gylfi lék síðustu 20 mínúturnar fyrir Tottenham sem sigraði fyrrum félaga Gylfa í Swansea 1-0 á heimavelli í ensku úrvalsdeildinni í fótbolta í dag.

Tottenham var mun sterkari aðilinn allan leikinn en náðu ekki að nýta fín færi sem liðið fékk í fyrri hálfleik. Swansea ógnaði sjaldan marki Tottenham og fóru leikmenn liðsins sælir með markalausa stöðu inn í hálfleik.

Það var ekki fyrr en Gylfi kom inn á að hlutirnir fóru að gerast því Tottenham skoraði sigurmarkið fimm mínútum eftir að Gylfa var skipt inn á. Jan Vertonghen skoraði með góðu skoti í teignum eftir aukaspyrnu Kyle Walker frá hægri.

Gylfi lagði svo upp dauðafæri fyrir Jermaine Defoe á 88. mínútu með hnitmiðaðri stungusendingu en Gerhard Tremmel varði vel í markinu.

Tottenham lyfti sér upp í fjórða sæti deildarinnar með 29 stig, jafn mörg og Chelsea sem er í sætinu fyrir ofan á betri markamun.

Swansea er 10. sæti með 23 stig.