Arsenal-goðsögnin Ian Wright: Önnur félög væru búin að reka Wenger

Ian Wright, annar markahæsti leikmaður Arsenal frá upphafi og ein af goðsögnunum úr sögu félagsins, er viss um það að Arsène Wenger væri ekki enn í starfi ef hann hefði verið hjá einhverju öðru félagi í Englandi.

„Ég er ekki að segja að hann verði að fara frá Arsenal en hann er í einstakri aðstöðu. Ég held að enginn annar hefði lifað af svona lengi og það sést ekki einu sinni ljós við enda gangnanna," sagði Ian Wright í útvarpsviðtali.

Arsène Wenger hefur verið knattspyrnustjóri Arsenal í sextán ár og liðið vann á sínum þrjá meistaratitla og fjóra bikarmeistaratitla undir hans stjórn. Síðasti titill vannst 2005 og síðan eru liðin sjö titlalaus ár.

„Ég heyri hann oft tala um það efir leiki að það sé góður andi í liðinu en það lítur ekki út fyrir að svo sé raunin. Hann sér ekki sannleikann eins og ég sé hann og hann segir ekki rétt frá heldur," sagði Ian Wright.

Arsenal er eins og er í áttunda sæti ensku úrvalsdeildarinnar með 24 stig eða 18 stigum minna en topplið Manchester United.