Lampard dreymir um að verða knattspyrnustjóri Chelsea

Chelsea-goðsögnin Frank Lampard er þegar farinn að huga að lífinu eftir að skórnir fara upp á hillu en það lítur út fyrir að Lampard verði áfram viðloðandi fótboltann. Lampard hefur verið hjá Chelsea síðan 2001 og dreymir um að fara í fótsport manna eins og Ruud Gullit, Gianluca Vialli og Roberto Di Matteo sem allt urðu knattspyrnustjórar hjá Chelsea eftir að hafa spilað fyrir félagið.

Lampard er orðinn 34 ára gamall og á því ekki mörg ár eftir inn á vellinum. Hann er þegar farinn að safna sér þjálfararéttundum en viðurkennir þó að í raun komi bara eitt félag til greina.

„Ég veit að ég get aldrei búist við því að labba inn og setjast í stjórastólinn hjá Chelsea en þetta er samt eina fótboltafélagið sem ég hef áhuga á að stýra," sagði Frank Lampard í viðtali við The Sun.

„Ég er farinn að hugsa að safna mér þjálfararéttindum en þótt ég hljómi kannski sjálfselskur þá vil ég ekki frumsýna mig hjá minna félagi. Það væri gaman að fá að reyna sig hjá Chelsea en ég vil samt gera það vel," sagði Lampard.

Lampard hefur spilað fyrir þekkta stjóra eins og þá Claudio Ranieri, Jose Mourinho, Luiz Felipe Scolari, Guus Hiddink og Andre Villas-Boas. Hann ætti því að geta notfært sér það í framtíðinni.

„Ég hef lært margt af þeim en ég myndi líka gera margt öðruvísi. Það mikilvægasta sem ég hef lært er að umgangast fólk á réttan hátt. Það er mikilvægt að bera virðingu fyrir leikmönnum og vinna sér inn virðingu þeirra til baka," sagði Lampard.